.

Alternative flash content

Requirements

Get Adobe Flash player

Минтақа

Кохи муҳташами илму ирфон дар Хуҷанд

Донишгоҳи давлатии Хуҷанд ба номи академик Бобоҷон Ғафуров

Донишгоҳи давлатии Хуҷанд ба номи Қаҳрамони Тоҷикистон, академик Бобоҷон Ғафуров, яке аз куҳантарин, бонуфузтарин ва машҳуртарин муассисаҳои олии касбии ҷумҳурӣ ба ҳисоб рафта, нахустин маротиба соли 1932 ҳамчун Донишкадаи олии омӯзгории Хуҷанд таъсис ёфта, соли 1938 номи Донишкадаи давлатии омӯзгории Ленинобод ба номи С. М. Кировро гирифт. Бо Фармони Президенти Ҷумҳурии Тоҷикистон аз 13.07.1991 донишкадаи мазкур ба Донишгоҳи давлатии Хуҷанд табдили ном кард ва аз 26-уми апрели соли 1997 ба он номи академик Бобоҷон Ғафуров гузошта шуд.

Дар тӯли 86 соли фаъолияти худ, ин махзани муқаддаси илму маърифат ҳазорон дастпарварони болаёқатро парвариш намуда, ба яке аз нерӯмандтарин муассисаҳои таълимӣ, тарбиявӣ ва илмии мамлакат табдил ёфт. Тӯли ин солҳо донишгоҳ на танҳо ҳамчун маркази асосии парвариши мутахассисони соҳаи омӯзгорӣ ва мактабу маориф, балки чун тарбиятгари мутахассисони риштаҳои гуногуни хоҷагии халқ, иқтисодиёт ва илму техника маъруфу машҳур гардид.

Донишгоҳ айни замон дорои пойгоҳи бойи моддӣ-техникӣ буда, дар он 8 бинои таълимӣ, 6 хобгоҳ, 356 синфхонаҳои таълимӣ, 101 лабараторияҳои таълимӣ, 130 кабинети махсус, 76 кабинети таълимӣ, 47 синфхонаи таълимӣ, 70 кабинети лингофонӣ, 154 тахтаҳои электронӣ, 304 проекторҳо, 1200 компутерҳои фардӣ, 16 адад серверӣ ва лабараторияҳои биологӣ, химиявӣ, электротехникӣ мавҷуд буда, шабакаи ягонаи интернет тариқи нахи оптикӣ амал мекунад, ки дар Тоҷикистон назир надорад. Китобхонаҳои марказӣ, рақамӣ ва электронӣ бо фарогирии беш аз 500 ҳазор адабиёт фаъоланд.

Донишгоҳ дорои хобгоҳи замонавӣ буда, дар он 1484 нафар донишҷӯён зиндагӣ мекунанд, ки аз онҳо 1157 нафарашонро духтарон ташкил медиҳанд. Шумораи ятимоне, ки дар хобгоҳ зиндагӣ мекунанд, 26 нафарро ташкил медиҳад ва онҳо ба таври ройгон ба хобгоҳ таъмин карда шудаанд.

Феълан донишгоҳ барои ба меъёрҳои ҷаҳонии таълиму тадрис мутобиқ сохтани тарбияи мутахассисон, таҳсил ва маълумоти бисёрзинагӣ, аз ҷумла, бакалавр, магистр, мутахассис кӯшиш ба харҷ медиҳад. Вусъати таълиму тарбия, илм дар донишгоҳ, афзудани самту равияи ихтисосҳо ва васеъ гардидани доираи фаъолияти факултетҳоро метавон натиҷаи амали самарабахш ва анҷоми муваффақонаи рисолати мактаби олӣ муаррифӣ намуд.

 

Шумораи умумии устодон ва донишҷӯён

Имрӯзҳо 790 нафар ҳайати профессорону омӯзгорони донишгоҳ ба донишҷӯён таълим медиҳанд, ки 43 нафарашон докторони илм ва профессорон, 350 нафар номзадҳои илм ва дотсентон, 193 нафар муаллимони калон ва 318 нафар муаллимон мебошанд. Шумораи устодон аз ҳисоби бонувон зиёда аз 541 нафарро ташкил медиҳад. Донишгоҳ дорои 20628 нафар донишҷӯ мебошад, ки аз ин 4338 нафар тариқи буҷавӣ ва 16290 нафар тариқи шартномавӣ таҳсил менамоянд. Аз шумораи умумии донишҷӯён 212 нафарашонро донишҷӯёни хориҷӣ ташкил медиҳанд.

 

Факултетҳо ва ихтисосҳо

Дар Донишгоҳи давлатии Хуҷанд ба номи академик Бобоҷон Ғафуров дар асоси нақшаҳои таълимӣ таҳсил аз рӯи 73 ихтисос дар шуъбаи рӯзона ва 29 ихтисос дар шуъбаи ғоибона сурат мегирад. Муассиса дорои 17 факултет ва 77 кафедраҳо буда, раванди таълим тибқи низоми кредитии таҳсил ба роҳ монда шудааст. 

Ихтисосҳое, ки дар донишгоҳ омӯхта мешаванд:

Факултети МАТЕМАТИКА

1. Математика1-02 05 01

2. Математикаи амалӣ 1-31 03 03-02

3. Математика-физика 1-02 05 03-01

4. Информатика1-02 05 05

Факултети ФИЗИКАЮ ТЕХНИКА

5. Физикаю математика1-02 05 03-01

6. Физика1-02 05 02

7. Мошинҳои ҳисоббарор, низомҳо ва шабакаҳо 1-40 02 01

8. Радиофизика1-31 04 02

9. Дастгоҳи электронӣ1-38 01 03

10. Электроникаи тиббӣ1-31 04 03-09

Факултети БИОЛОГИЯ ВА ХИМИЯ

11. Биология1-02 04 01

12. Химия1-02 04 03

13. Кори тиббии биологӣ1-80 02 01

Факултети ГЕОЭКОЛОГИЯ

14. География1-02 04 02

15. География-демография1-02 04 05

16. Геоэкология1-33 01 02

17. Экология1-33 01 01 01

18. Агроэкология 1-33 01 06

19. Метереология ва климатология1-31 02 01-02 09

20. География ва ҳифзи табиат1-02 04 05-04

21. Географияи сайёҳӣ ва менеҷменти сайёҳат 1-31 02 01-02 03

Факултети ПЕДАГОГӢ

22. Психология1-23 01 04

23. Олигофренопедагогика1-03 03 04

24. Таҳсилоти томактабӣ1-01 01 02-06

25. Тахсилоти ибтидоӣ. Забони хориҷӣ 1-010202-05

26. Таҳсилоти ибтидоӣ 1-01 02 01

Факултети ТАРБИЯИ ҶИСМОНӢ

27. Тарбияи ҷисмонӣ1-03 02 01

28. Тарбияи ҷисмонӣ. Омодагии дифои ҳарбӣ 1-03 02 02

Факултети ФИЛОЛОГИЯИ РУС

29. Забон ва адабиёти рус1-21 05 01

30. Забони тарҷумони русӣ1-21 06 01 02

31. Забон ва адабиёти рус дар мактабҳои миллӣ1-02 03 02

Факултети САНЪАТИ ТАСВИРӢ ВА ТЕХНОЛОГИЯ

32. Санъати тасвирӣ ва нақшаи техникӣ 1-03 01 06-02

33. Дизайни графикӣ1-19 01 01

34. Дизайни маҳсулоти дӯзандагӣ 1-02 06 02-08

35. Технология1-02 06 01

Факултети ТАЪРИХ ВА ҲУҚУҚ

36. Таърих1-02 01 01

37. Таърих - бостоншинос1-21 03 01-02

38. Таърих ва ҳуқуқ1-02 01 02

Факултети ФИЛОЛОГИЯИ ТОҶИК

39. Забон ва адабиёти тоҷик 1-02 03 01

40. Фарханги ҷаҳонӣ ва ватанӣ 1-02 02 04

41. Рӯзноманигорӣ1-23 01 08

42. Забони тоҷикӣ дар мактабҳои ӯзбекӣ1-21 05 02-07

Факултети ЗАБОНҲОИ ХОРИҶӢ

43. Забони англисӣ1-21 05 02-08

44. Назария ва амалияи тарҷума (забони англисӣ) 1-21 05 06-04

45. Забони олмонӣ1-21 05 02-08 01

46. Назария ва амалияи тарҷума (забони олмонӣ) 1-21.05.06.04.01

Факултети ЗАБОНҲОИ ШАРҚ

47. Забони арабӣ - англисӣ1-21 05 07

48. Форсӣ - англисӣ1-21 05 04

49. Забони чинӣ1-21 06 01-01 02

50. Забони арабӣ - тоҷикӣ1-21 06 01-01 06 -02

Факултети ФИЛОЛОГИЯИ ӮЗБЕК

51. Забон ва адабиёти ӯзбек 1-21 05 01-08

52. Забон ва адабиёти тоҷик ва забон ва адабиёти ӯзбек 1-0203070102

Факултети ТЕЛЕКОММУНИКАТСИЯ ВА ТЕХНОЛОГИЯИ ИТТИЛООТӢ

53. Таъмин. Математикӣ ва технонлогияи ҳисоббарор ва низом.1-31 03 03-01 08

54. Системаи бисёршабакавии телекоммуникатсионӣ1-45 01 01

55. Системаи телекоммуникатсионӣ - истифодабарӣ1-95 02 04-01

56. Автоматонии системаҳои ҷамъоварӣ ва коркарди иттилооти молиявӣ ва тиҷоратӣ  1-53.01.02.04

57. Информатикаи иқтисодӣ 1-25 01-12

58. Амнияти компютерӣ1-98010101

59. Кибернетикаи иқтисодӣ1-31 03 06-02

60. Таъминоти барномавии технологияи итилоотӣ 1-40.01.01

Факултети МОЛИЯ ВА ИҚТИСОДИЁТИ БОЗОР

61. Молия ва назарияи фаъолияти соҳаи гумрук1-25 01 04-09

62. Маркетинг 1-26 02 03

63. Аудит ва ревизия 1-25 01 11

64. Баҳисобгирии бухгалтерӣ 1-25 01 08

65. Менеҷменти иҷтимоӣ1-26 02 02-06

66. Кори бонкӣ1-25 01 04-02

67. Иқтисодиёти ҷаҳонӣ1-25 01 03

Факултети САНЪАТ

68. Эҷодиёти халқӣ 1-18 01 01-02

69. Санъати мусиқӣ1-03 01 02-02

70. Сурудхонии халқӣ1-16 01 10-02

71. Манзаранависӣ - дастгоҳӣ1-15 01 01 01

72. Ҳайкалтарошӣ1-15 01 03

73. Санъати актёрӣ1-17.01.01

74. Китобхонашиносӣ1-23 01 11 01

Факултети таҳсилоти ғоибона дар ноҳияи Ҷаббор Расулов

75. Забон ва адабиёти тоҷик, н. Ҷ. Расулов 1-02.03.01

76. Педагогика ва МТИ, н. Ҷ. Расулов1-01.02.02

77. Педагогика ва психологияи томактабӣ, н. Ҷ. Расулов 1-01.01.02.06

 

Ҳамкориҳо бо донишгоҳу донишкадаҳои хориҷӣ

Дар донишгоҳ шуъбаи робитаҳои байналмилалӣ мавҷуд аст, ки бо масъалаҳои ба роҳ мондан ва густариш додани шаклҳои гуногуни ҳамкории Донишгоҳ бо марказҳои илмӣ-таҳқиқотӣ ва мактабҳои олии кишварҳои мухталифи ҷаҳон, сафоратхонаҳо ва муассисаҳои байналмилалӣ, ҳамчунин мусоидат намудан барои таҳсил ва бақайдгирии донишҷӯёне, ки аз хориҷаи дуру наздик дар донишгоҳ таҳсил менамоянд, машғул аст. Донишгоҳ алҳол бо 45 донишгоҳҳои олии мамлакатҳои дуру наздик ҳамкорӣ дорад. Соли 2018 - 12 (дувоздаҳ) шартномаҳои ҳамкорӣ бо Донишгоҳи давлатии педагогии Москва, Донишгоҳи давлатии Оренбург, Донишгоҳи давлатии педагогии Оренбург, Донишгоҳи Латвия, донишгоҳҳои давлатии Самарқанд, Фарғона, ва Андиҷони ба номи М. Бабури Ҷумҳурии Ӯзбекистон, Донишгоҳи қирғизӣ-ӯзбекии Ҷумҳурии Қирғизистон ба имзо расонида шудааст.

Бояд гуфт, ки Донишгоҳи давлатии Хуҷанд робитаҳои хеле ҷиддиро бо донишгоҳҳову донишкадаҳои машҳури хориҷӣ ба роҳ монда, инчунин бо Донишгоҳи давлатии иқтисодиёт, статистика ва информатикаи Москва (Русия), Донишгоҳи давлатии Ош (Ҷумҳурии Қирғизистон), Донишгоҳи давлатии Боткент (Ҷумҳурии Қирғизистон), Донишгоҳи миллии Қазоқистон ба номи ал-Форобӣ, Маркази илмӣ - таҳқиқотии Юлих (Олмон), Донишгоҳи давлатии техникии Қирғизистон ба номи Исоқ Раззоқов (Қирғизистон), Донишгоҳи Даугавпилси Латвия (Латвия) ва ғайра шартномаҳо дорад.

Дар давраи нави эълони барномаи байналмилалии Эрасмус+, ки аз ҷониби Иттиҳоди Аврупо барои беҳтар намудани сифати таҳсилот равона карда шудааст, 5 мандат ба имзо расонида шудааст.

Дар донишгоҳ 13 лоиҳаи байналмилалии барномаи Иттиҳоди Аврупо дар амал татбиқ гардидааст. Алҳол 4 лоиҳаи ин барномаи ERASMUS+ амалӣ карда мешавад. 

 

Номи барномаУнвони лоиҳаМуҳлати иҷроиш

RASMUS+ TUTORIALМустҳкам намудани шабакаи таҳсилот, тадқиқот ва инноватсия дар соҳаи тозагӣ ва муҳити зист.2016-2019

ERASMUS+ PAWERФароҳам овардани шароити мубодилавӣ, илмии байниминтақавӣ ва таъмини сифат ва  дастрасии кулл2016-2019

ERASMUS+ EXTENDБеҳдошти таҳсилоти инженерӣ тавассути тайёр кардани омӯзгорон ва методҳои нави педагогӣ  дар Русия ва Тоҷикистон2017-2020

ERASMUS+ DECIDEБеҳтар намудани хизматрасонии таҳсилотӣ ба шахсони имконияташон маҳдуд2018 - 2021

Дар озмуни сафоратхонаи Ҷумҳурии Ҳиндустон дар шаҳри Душанбе донишҷӯёни донишгоҳ ширкат варзида, 5 нафари онҳо ғолиби озмун гардиданд ва соҳиби роҳхат ба донишгоҳҳои бонуфузи Ҳиндустон барои соли таҳсили 2018-2019 гаштанд. Ҳамзамон, 2 нафар омӯзгорони факултети биология - химия барои баланд бардоштани сатҳи ихтисоси худ тариқи таҳсилоти фосилавии кӯтоҳмуддат дар Донишгоҳи давлатии Олтой таҳсил карда истодаанд.

Тибқи қарори Шӯрои олимони донишгоҳ бо мақсади амалӣ намудани бандҳои “Барномаи давлатии омӯзиши забонҳои англисӣ ва русӣ барои солҳои 2015-2020” дар донишгоҳ 11 гуруҳи курсҳои омӯзиши забони англисӣ барои устодон ва кормандон ройгон ташкил карда шудааст.

 

Шуъбаи аспирантура ва докторантура

Дар донишгоҳ шуъбаи аспирантура ва докторантура амал мекунад. Аспирантураи донишгоҳ аз рӯи ихтисосҳои математика, физика, химия, таърих, география, филология, педагогика ва иқтисодӣ кадрҳои педагогиро тайёр мекунад. Ҳоло аз рӯи 26 ихтисос дар шуъбаи аспирантура кадрҳои илмии ҷавони соҳибунвон тайёр карда мешаванд. Ба корҳои илмии аспирантон докторони илм, профессорон роҳбарӣ мекунанд. Зиёда аз 50 нафар докторону номзадони илми донишгоҳ роҳбарони илмии аспирантон ва унвонҷӯён мебошанд. Аспирантоне, ки нақшаи инфиродиро дар вақташ иҷро мекунанд ва ба дастовардҳои назаррас ноил мешаванд, соҳиби идрорҳои номии Президенти Ҷумҳурии Тоҷикистон ва Раиси вилояти Суғд мешаванд. Тибқи фармоиши Вазорати маориф ва илми ҶТ дар донишгоҳ аз 13-уми июни соли 2008 докторантура аз рӯи ҳафт номгӯи ихтисос 01.01.01 - Таҳлили математикӣ, 01.04.01 - Физикаи эксперименталӣ, 01.04.07 - Физикаи ҷисмҳои сахт, 10.01.03 - Адабиёти халқҳои кишварҳои хориҷӣ (адабиёти тоҷик), 10.02.22 - Забонҳои давлатҳои хориҷаи Аврупо, Осиё, Африқо ва мардуми бумии Амрико ва Австралия (забони тоҷикӣ), 07.00.02 - Таърихи Ватан, 13.00.02 - Назария ва методикаи таълим ва тарбия (аз рӯи ихтисосҳо) таъсис ёфтааст. Ҳамзамон дар Донишгоҳи давлатии Хуҷанд ба номи академик Бобоҷон Fафуров тибқи фармоиши Вазири маориф ва илми Ҷумҳурии Тоҷикистон аз 27.04.2015, №1015 докторантура аз рӯи ихтисос таъсис ёфтааст. Ба докторантураи донишгоҳ аз рӯи 20 номгӯи ихтисос шаҳрвандоне, ки дорои дараҷаи академикии «магистр» мебошанд, қабул карда мешаванд. Докторантура аз рӯи ихтисос барои тайёр намудани кадрҳои баландихтисоси илмӣ ва илмию педагогӣ бо додани дараҷаи илмии «доктори фалсафа (РhD)», «доктор аз рӯи ихтисос» мусоидат менамояд. 

 

Таҷрибаомӯзии истеҳсолӣ ва сатҳи ба кор таъминшавӣ

Дар донишгоҳ ташкил ва гузаронидани дарсҳои таҷрибавӣ дар самти ихтисосҳои педагогӣ дар 15 мактаби пойгоҳии донишгоҳ мунтазам идома дорад. Барои  такмил додан ва баргузор намудани дарсҳои таҷрибавӣ имрӯз аз рӯйи ихтисосҳои ғайри омӯзгорӣ донишгоҳ бо зиёда аз 45 корхона, ташкилот ва муассисаҳои давлатӣ ва ғайридавлатии шаҳру навоҳии вилояти Суғд ҳамкории судманд дорад.

Мутобиқи фармоиши Вазири маориф ва илми Ҷумҳурии Тоҷикистон аз 23.02.2018, №938 “Дар бораи тақсимоти мутахассисони ҷавон дар соли 2018”, дар асоси “Низомномаи тақсимот ва бо ҷои кор таъмин намудани мутахассисони ҷавон”, моддаи 24-и Қонуни Ҷумҳурии Тоҷикистон “Дар бораи маориф” барои ихтисосҳои омӯзгорӣ ва ғайри омӯзгории шакли таҳсили буҷавӣ комиссияи тақсимоти фардии хатмкунандагони зинаи “бакалавр” ва “мутахассис”-и МДТ “Донишгоҳи давлатии Хуҷанд ба номи академик Б. Ғафуров” таъсис дода шуда,  раванди ба ҷои кор тақсим намудани мутахассисони соҳаи омӯзгорӣ ва ғайри омӯзгории шакли таҳсили буҷавӣ соли таҳсили  2017-2018 дар сатҳи зарурӣ ба роҳ монда шудааст.

 

Кӯмаки донишгоҳ ба донишҷӯёни ятими кулл

Қайд кардан бамаврид аст, ки дар донишгоҳ ятимону маъюбон ба таври шоён дастгирӣ карда мешаванд. Инро ҳам маъмурияти донишгоҳ ва ҳам ятимону маъюбоне, ки дар он ҷо таҳсил мекунанд, тасдиқ карданд. Дар соли хониши 2017-2018 дар донишгоҳ 54 нафар донишҷӯёни ятиму бепарастор, 59 нафар маъюбони гуруҳҳои 1, 2, 3  ва 428 нафар муҳассилини аз падар ё модар маҳруммонда таҳсил доранд. Ба донишҷӯёни ятиму бепарастор ва имконияташон маҳдуд ба ғайр аз стипендияи муқаррарии ҳармоҳа иловатан ба маблағи 130 сомонӣ кӯмакпулӣ дода мешавад. Донишгоҳ соли равон инчунин як нафар донишҷӯйи соли 2-и факултети таърих ва ҳуқуқро, ки ятиму бепарастор мебошад, барои табобат ва истироҳат ба осоишгоҳи “Шифо” фиристода, ӯро бо стипендияи ҳармоҳинаи КМИК дар ҳаҷми 130 сомонӣ таъмин намуд. Дар соли хониши 2017-2018 ба ин табақаи донишҷӯён дар умум ба маблағи 254762 сомонӣ ёрӣ расонида шудааст.

 

Бахши такмили ихтисос

Бо ташаббуси донишгоҳ ҳар сол устодону омӯзгорони донишгоҳ аз курси сайёри такмили ихтисос гузаронида мешаванд. Мувофиқи шартномаи дутарафа бо Донишкадаи такмили ихтисоси омӯзгорони муассисаҳои таҳсилоти олии касбии назди Донишгоҳи миллии Тоҷикистон соли 2018 бо фармоиши ректори донишгоҳ то 11.01.2018 бо равияи иқтисодӣ 10 нафар омӯзгорони факултети молия ва иқтисодиёти бозор ва телекоммуникатсия ва технологияи иттилоотӣ, бо равияи гуманитарӣ 30 нафар омӯзгорони факултети таърих ва ҳуқуқ, педагогӣ, кафедраҳои умумидонишгоҳии педагогикаи умумӣ, фалсафа ва психологияи умумӣ, бо равияи гуманитарӣ (забони тоҷикӣ, забони форсӣ ва забони арабӣ) баргузор гашт, ки 44 нафар омӯзгорони факултетҳои забонҳои Шарқ (25 нафар), педагогӣ (12 нафар), филологияи тоҷик (5 нафар) ва кафедраи умумидонишгоҳии забони тоҷикӣ (8 нафар) мебошанд.

Дар курси сайёри тахассуси таҳсилоти фосилавӣ, ки аз 05.06.2018 то 22.06.2018 баргузор гардид, 66 нафар омӯзгорони донишгоҳ ширкат варзида, тахассуси худро баланд бардоштанд.

35 нафар омӯзгорони донишгоҳ аз омӯзиши курсҳои тахассусии забони русӣ ва англисӣ аз санаи 22.10.2018 то 08.11.2018 соҳиби диплом гаштанд.

Умуман, дар соли 2018 аз 756 нафар омӯзгорон 192 нафарашон аз такмили ихтисос гузаштанд. Ин нишондиҳанда 25,3%-ро ташкил медиҳад, ки +5,3% аз меъёр зиёд мебошад. 

 

Дастовардҳо ва ихтироот дар 2 соли охир

Дар МДТ “Донишгоҳи давлатии Хуҷанд ба номи академик Бобоҷон Ғафуров” раванди навоварӣ ва ихтироъкорӣ дар сатҳи хеле назаррас ҷараён дорад. Бояд таъкид кард, ки донишҷӯён дар «Фестивали ҷумҳуриявии донишҷӯёни навовар ва ихтироъкори муассисаҳои таҳсилоти олии касбӣ», озмуни вилоятии “Ихтироъкорон ва навоварони ҷавони вилоят”, озмуни вилоятии “Барномасози беҳтарин” бахшида ба Соли ҷавонон байни ҷавонон, озмуни «Ихтироъкорон ва навоварони ҷавони шаҳр», ки аз ҷониби Мақомоти иҷроияи ҳокимияти давлатии шаҳри Хуҷанд баргузор гардид, ширкат варзида, ҷойҳои намоёнро сазовор гардиданд.

Роҳбари ихтироъкорони донишгоҳ, профессори кафедраи физикаи умумӣ ва ҷисмҳои сахти факултети физикаю техника Шерматов М. аз ҷониби Муассисаи давлатии Маркази миллии патенту иттилооти Вазорати рушди иқтисод ва савдои Ҷумҳурии Тоҷикистон бо назардошти дастовардҳои назарраси навовариву ихтироъкорӣ диплом ба даст овард. 

 

Иштирок дар олимпиадаҳо

Дар асоси мактуби Вазорати маориф ва илми Ҷумҳурии Тоҷикистон аз 27-уми январи соли 2017, таҳти №30001/23 доир ба баргузор намудани Олимпиадаи донишҷӯёни муассисаҳои таҳсилоти олии касбии ҷумҳурӣ барои дарёфти “Ҷоми академияи илми Ҷумҳурии Тоҷикистон” донишгоҳ барои дар сатҳи баланди ташкилӣ гузаронидани ин маъракаи муҳими илмӣ чораҳои муҳимеро роҳандозӣ намуд. Бо ин ҳадаф санаи 31-уми январи соли 2017 фармоиши ректори донишгоҳ ҷиҳати ташкили даври якуми Олимпиадаи зинаи бакалавр ва мутахассиси курсҳои якуму панҷуми донишгоҳ аз рӯйи 12 соҳаи илм ба имзо расид, ки тибқи он аз санаи 10-ум то 20-уми феврал озмун дар ҳамаи факултетҳо ва кафедраҳои дахлдори умумидонишгоҳӣ гузаронида шуд ва ғолибон ҷиҳати иштирок ба академия сафарбар гардиданд.

Дар Олимпиадаи донишҷӯёни муассисаҳои таҳсилоти олии касбии Ҷумҳурии Тоҷикистон (20-21-уми апрели соли равон, шаҳри Кӯлоб) донишҷӯёни зиёде ҷойҳои намоёнро ишғол намуданд, ки ин боиси ифтихори донишгоҳ аст.

Ҳамчунин, 12 нафар донишҷӯёни донишгоҳ соли 2018 дар Олимпиадаи ҷумҳуриявии донишҷӯёни муассисаҳои таҳсилоти олии касбӣ ширкат варзида, Ҳошимбоев Фаррух - донишҷӯи курси якуми факултети телекоммуникатсия ва технологияи иттилоотӣ аз рӯи ихтисоси информатика сазовори ҷойи аввал гардид. Аз фанни химия ҳамзамон чор нафар донишҷӯён аз ихтисосҳои дигар бо гирифтани Ифтихорномаи Вазири маориф ва илми ҶТ мушарраф шуданд.

 

Ба ҷои хулоса

Донишгоҳи давлатии Хуҷанд ба номи академик Бобоҷон Ғафуров дар тӯли фаъолияти дуру дароз ва пурсамари худ дар омодасозии кадрҳо ва тарбияи мутахассисони баландихтисос рисолати хешро ба таври шоиста ва сарбаландона иҷро намуда истодааст. Тавре ректори донишгоҳ, доктори илмҳои таърих, профессор Ҷӯразода Ҷамшед Ҳабибулло иброз доштанд, “мутмаин бар онем, ки ҷомеаи устодону донишҷӯёни донишгоҳи мо дар радифи дигар макотиби олии кишвар он рисолати муқаддаси хешро, ки бар дӯш доранд, бо шоистагӣ, сарбаландӣ, азму ғайрат, ҳисси масъулият ва дарку эҳсоси баланди ватандӯстӣ ба субут мерасонанд”.

Мо низ зимни боздид аз донишгоҳ бар ин гуфтаҳо мутмаин шудем ва бовар дорем, ки донишгоҳи мазкур дар оянда низ ин рисолати хешро ҳаматарафа иҷро мекунад ва дар тайёр намудани мутахассисони сатҳи ҷаҳонӣ ҳамрадифи пешқадамтарин донишгоҳҳои ҷаҳонӣ хоҳад шуд.

 

МТЖТ

Хонданд 70
Ноҳияи Абдураҳмони Ҷомӣ: 80 дарсади роҳҳои маҳаллӣ ҳоли хароб доранд

Аз ҷамъи умумии роҳҳои аҳмияти маҳаллидоштаи ноҳияи Абдураҳмони Ҷомӣ 80 дарсади он вазъи ногувор дошта, барои рафтуомади воситаҳои нақлиёт монеа эҷод мекунанд.

 

Ронандаҳо низ аз харобии роҳ нигаронанд

Вазъи хароби роҳҳои маҳаллӣ ронандагони воситаҳои нақлиётро дар ин ноҳия сахт нигарон кардааст. Ронандае, ки моро то назди Муассисаи давлатии нигоҳдории роҳҳои автомобилгарди ноҳия бурд, гуфт: “Аз вазъи хароби роҳҳо мо - ронандагон сахт дилгир шудаем. Чаро “андози роҳ” гуфта, аз мо пул мегиранд, аммо роҳҳоро таъмир намекунунд?”. Ба қавли ин ронанда, ки номашро Алӣ гуфт, “ҳатто роҳҳои маркази ноҳия ҳоли хароб доранд. Аз харобии роҳҳо мо ҳар моҳ мошинҳои худро таъмир мекунем ва аз ин кор хаста ҳам шудаем. Зеро, маблағи ночизеро, ки аз мусофиркашонӣ ба дастамон меояд, барои харидории қисмҳои эҳтиётии мошин харҷ мекунем”.

Дар ҳамин ҳол, Олим Тағоев, сармуҳандиси Муассисаи давлатии нигоҳдории роҳҳои автомобилгарди ноҳияи Абдураҳмони Ҷомӣ бо изҳори ташвиш афзуд, ки аз 227,6 км роҳҳои дар мувозинаи ин муассиса қарордошта  182 км роҳҳои маҳаллӣ мебошанд, ки 80 фоизи ин роҳҳо ба таъмиру навсозӣ ниёз доранд. Ба гуфтаи ӯ, барои таъмири роҳҳои маҳаллӣ бояд ҳукумати ноҳия маблағ ҷудо кунад. Аммо маблағҳое, ки барои таъмири роҳ аз тарафи буҷети ноҳия ҷудо мешаванд, нокифоя мебошанд. Номбурда зикр намуд, ки барои таъмири асосии 1 км роҳ беш аз як миллион сомонӣ лозим аст. 

- 22 ҳазор сомоние, ки барои таъмири роҳҳо аз ҳисоби мақомоти маҳаллии ноҳияи Абдураҳмони Ҷомӣ  ҷудо гардидааст, сари ҳар як километр роҳ моҳона 9 сомонӣ рост меояд, ки бо ин маблағ ягон корро ба сомон расонида наметавонем. Асфалтро мо худамон омода мекунем. Асфалти тафсон бошад, нархаш гарон аст. Мо қудрати харидорӣ кардани чунин маҳсулотро надорем,- илова кард ҳамсуҳбати мо.

Барои ислоҳи ин камбудӣ муассисаҳои нигаҳдории роҳҳо маҳсулоти зудтайёр бо номи “омехтаи сиёҳ” фикр карда баровардаанд. Ба гуфтаи масъулин, чунин маҳсулот назар ба “асфалти тафсон” як баробар арзон аст, аммо сифаташро ягон сохтор кафолат намедиҳад. Зеро “омехтаи сиёҳ” дар аввалин рӯзҳои боришот ё пас аз гузаштани мошинҳои гаронвазн ба зудӣ аз ҳам мерезад.

Манбаъ гуфт, ки барои таъмири роҳҳои маҳал бояд ҳукумати ноҳия маблағгузориро бештар кунад. Зеро рӯз то рӯз вазъи роҳҳои маҳаллӣ бадтар шуда истодаанд.

Даҳҳо ронандаи дигар аз он изҳори нигаронӣ карданд, ки аллакай фасли зимистон фаро расидаасту вақте боришоти борону барф зиёд мешавад, ҳаракат дар роҳҳои ноҳияи Абдураҳмони Ҷомӣ барои нақлиёт мушкил мегардад. Ҳатто кӯдакон дар ин роҳҳо базӯр ба мактаб мераванд ва ҳангоми гузаштани воситаҳои нақлиёт либосҳои онҳо пур аз обу лой мешавад.

 

4 пули мошингузар ҳоли бад доранд

Вазъи хароби роҳҳо дар ноҳияи Абдураҳмони Ҷомӣ мушкили асосӣ бошад, вазъи бади пулҳои мошингузар аз ин ҳам ваҳимтар аст. Зеро, ба қавли масъулон, дар ҳудуди ноҳия 4 пуле ҳаст, ки ронандагон аз болои онҳо ба мушкилӣ мегузаранд.

Ҳасан, ронандае, ки ба ҷамоати Арали ноҳия сафар кард, ӯро вазъи хароби пул нигарон намуд. Зеро пуле, ки дар ин ҷамоат аз болояш воситаҳои нақлиёт мегузаранд, қисмати байнаш пурра фурӯ рафта, аз ду тараф бо як мушкилӣ мошинҳо мегузаштанд. Ӯ мегӯяд, шабона нафаре, ки бори аввал ба ин ҷамоат меояд ва аз вазъи хароби пул огоҳ нест, шояд ба ҷони ӯ хатар таҳдид кунад. Зеро ба дохили заҳбур афтоданаш мумкин аст.

Ба гуфтаи Олим Тағоев, дар роҳҳои маҳаллии ноҳия 39 пули мошингузар мавҷуд аст, ки 4 адади онҳо пурра дар ҳолати корношоям қарор доранд: “Аз ноилоҷӣ нақлиёт мегузарад, аммо бояд онҳоро таъмир кард, лек аз кадом ҳисоб? Чунки, тибқи ҳисобе, ки мо кардем, барои таъмири пулҳои дар боло зикргардида 12 ҳазор сомонӣ лозим аст. Ин дар ҳолест, ки мақомоти маҳаллӣ барои таъмири роҳҳо ва пулҳо, ки масъулияташ ба зиммаи онҳост, дар 11 моҳ ҳамагӣ 22 ҳазор сомонӣ ҷудо кардаанду халос”.

 

Аломатҳои роҳро кӣ медуздад?

Ба гуфтаи масъулони  Муассисаи давлатии нигоҳдории роҳҳои автомобилгарди ноҳияи Абдураҳмони Ҷомӣ, дар роҳҳои аҳамияти ҷумҳуриявидошта 68 аломати роҳ намерасад. Роҳҳои маҳаллӣ бошад, қариб ки аломати роҳ надоранд. Барои насби он низ маблағ зарур аст, ки ин ҳолат бартараф карда шавад.

Масъулин изҳори нигаронӣ аз он карданд, ки 8 аломати роҳро касе дуздидааст:  “Ин вазъ моро нигарон кардааст. Зеро барои харидории як аломати роҳ дастикам 300 сомонӣ лозим аст”.

Таҳлилҳо нишон медиҳанд, ки баъзе аз роҳҳои маҳаллии ноҳияи Абдураҳмони Ҷомӣ тӯли 27 сол тамоман рӯи таъмирро надидаанд ва ниёз ба таъмири ҷиддӣ доранд. Барои бартараф кардани мушкилии ҷойдошта таваҷҷуҳи  хосаи ҳокимияти маҳаллии ноҳияи мазкур лозим аст. Пас, мо низ интизори ибтикори масъулинем.

 

Раҳмоналӣ ДОДАРХӮҶАЕВ, “ФАРАЖ”

Хонданд 66
60-соли пурмуҳтавои Литсейи касбӣ-техникии Шуғнон

Гузориши нухустини мо оид ба беҳтарин муассисаи ибтидоии касбӣ дар ВМБК аз Литсейи касбӣ-техникии ноҳияи Шуғнон ба номи ветерани ҶБВ Элназаров  Имомназар оғоз ёфт. Муассисае, ки соли 1958 нахуст ҳамчун Омӯзишгоҳи касбӣ-техникии №77 дар шаҳри Хоруғ таъсис ёфта, соли 1998 бо қарори Вазорати меҳнат ва ҳифзи иҷтимоии аҳолии Ҷумҳурии Тоҷикистон ба Литсейи касбӣ-техникии №77 табдил дода шуд ва соли равон аз таъсиси он 60 сол пур шуд.

Бинои муассисаи мазкур комилан нав ва замонавӣ буда, дар деҳоти Навободи ноҳияи Шуғнони ВМКБ ҷойгир аст ва 28 августи соли 2008 расман ба истифода дода шуда, соли хониши 2008-2009-ро муҳассилин маҳз дар ҳаминҷо оғоз намуданд. Дар тӯли фаъолияти 60 солаи худ муассисаи таълимӣ беш аз 40  ҳазор ҷавонону калонсолонро, аз рӯи тахассусҳои устои таъмири автомобил ва ронанда, ронандаи трактор, устои барқ, дӯзанда, муҳосиб, дуредгар, кафшергар, системаи компютерӣ ва интернет-технология, фелдшер, байтор тарбия намуда, ба хоҷагии халқи вилоят ва ҷумҳурӣ ҷалб намудааст. 

Дар айни замон дар литсей 47 нафар омӯзгорон ва устоҳои истеҳсолӣ фаъолият мекунанд, ки аз онҳо 22 нафар бо маълумоти олӣ, 15  нафар бо маълумоти миёнаи махсус ва 10 нафар бо маълумоти ибтидоии касбӣ, 5 нафар Аълочии маорифи Ҷумҳурии Тоҷикистон, 10 нафар дорои дараҷаи олӣ ва ғайра кор карда истодаанд. 

 

Ихтисосҳо

Дар Литсей дар 19 гуруҳ аз рӯи ихтисосҳои зерин мутахассисони сатҳи таҳсилоти ибтидоии касбӣ тайёр карда мешаванд:

Челонгари таъмири автомобил бо иловаи ронандаи дараҷаи «С»; 

«Монтажчии барқӣ оид ба таъмир ва хизматрасонии таҷҳизотҳои барқӣ»;

«Дуредгар»;

«Кафшергари газию барқӣ»;

«Дӯзанда»;

«Ҳисобдор бо донистани компютер»;

«Системаи компютерӣ  ва интернет-технология»;

«Фелдшер-бойтор».  

Аз моҳи сентябри соли 2016 дар ҳамкорӣ бо Ташкилоти байналмилалии хайриявии «Ҷовид» дар ноҳияи Ишкошим курсҳои кӯтоҳмуддати «Суратгир ва наворбардор», «Бофандагӣ» ва «Қаннодӣ» дар базаи муассисаи таълимии деҳаи Шитхарв кушода шуданд. Инчунин бо ҳамкорӣ бо ташкилоти номбурда тибқи нақшаи дурнамо дар давоми соли 2018 ба ҳолати 28.11.2018 курсҳои кӯтоҳмуддати 2-моҳа ва 3-моҳа аз рӯи ихтисосҳои ронандаи дараҷаи «С» бо ҷалби 150 нафар, «Монтёри барқӣ» бо ҷалби 15 нафар, «Тракторчӣ» бо ҷалби 30 нафар, «Гармхона» бо ҷалби 45 нафар, «Боғдорӣ» бо ҷалби 15 нафар ва «Бофандагӣ» бо ҷалби 15 нафар, ҷамъ 270 нафар, аз он ҷумла 26 нафар духтарон хатм намуданд.

Дар моҳи майи соли 2018 курсҳои кӯтоҳмуддати шартномавӣ «Тракторчӣ» бо ҷалби 30 нафар, «Замбури асалпарварӣ» бо ҷалби 20 нафар», «Сабзавоткорӣ» боҷалби 15 нафар, ҷамъ 45 нафар кушода шуда, ин курсҳоро хатм намуданд.

 

Парки технологӣ

Дар литсей 4 устохонаҳои истеҳсолӣ, 14 кабинети таълимӣ, 1 китобхона, 1 қироатхона, 1 майдончаи варзишӣ, 1 утоқи варзишӣ, 1-ошхона барои хонандагон, 1 осорхона мавҷуданд. 

Литсейи касбии техникии н.Шуғнон дорои кабинетҳои муҷаҳҳазгардонидаи забон ва адабиёти тоҷик, дӯзандагӣ, кабинети забони русӣ, забони англисӣ, сохти автомобил, қоидаҳои ҳаракати нақлиёт дар роҳҳои Ҷумҳурии Тоҷикистон, кабинети омодагии дифои ҳарбӣ, кабинети дуредгарӣ, кабинети физика ва электротехника, кабинети технологияи информатсионӣ, кабинети челонгарӣ ва корҳои амалӣ аз автомобил, кабинети тренажёр, кабинети химия, кабинети касбинтихобкунӣ мавҷуд мебошад. Дар литсей инчунин устохонаҳои кафшергари газию-барқӣ, дуредгарӣ, устохонаи коркарди мебел, дӯзандагӣ, корҳои амалӣ аз автомобил ва электротехника фаъолият намуда истодаанд.

Дар соли 2018 кабинети забони русӣ аз нав ҷиҳозонида шуда, 2 адад мизҳои компютерӣ, 2 адад компютерҳо, 1 адад тахтаи электронӣ ва 1 адад телефакс дар он ҷобаҷо карда шуданд. Ташкилоти ҷамъиятии байналмилалии хайриявии «Човид», ки аз тарафи Иттиҳоди Аврупо маблағгузорӣ шуда буд, ба таври ройгон ба литсей 8 адад компютер, 4 адад принтер, 1 адад телевизор, 1 адад DVD, 8 адад мошинҳои дузандагӣ 10 адад миз 20 адад курсӣ, 1 адад апарати металбурӣ, 1 адад апарати кафшергарӣ мадад намуд.

Базаи моддӣ-техникии литсей ва гуруҳҳои амалкунандаи он дар ноҳияҳои Мурғоб, Рушон , Роштқалъа ва Ишкошим мувофиқи шароит ва имкониятҳои мавҷуда мустаҳкам гардид.

Дар моҳи сентябри соли 2016 кабинети дуюми технологияи информатсионӣ ташкил ва ҷиҳозонида шуд. Дар литсей 2 толори варзиш, ки пурра бо асбобҳо ва таҳҷизотҳои лозимӣ барои варзиш ҷиҳозонида шудаанд, дар хизмати хонандагон ва омӯзгорон ҳаст.

Барои таъмини ошхонаи литсей бо сабзавоти тару тоза дар литсей гармхона сохта шудааст. Маъмурияти литсей бо Донишгоҳи Осиёи Марказӣ, Шабакаҳои барқии «Помир энерҷӣ» ва ҶДММ «Темур» дар соли 2015 шартномаҳои тарафайн оиди ҳамкориро ба имзо расонида, аз ҳисоби Шабакаҳои барқии «Помир энерҷӣ» дар литсей сохтмони майдони озмоишии «Қоидаҳои бехатарии барқӣ» соли 2017 ба нақша гирифта шудааст.

 

Намояндагиҳо

Дар ҳамкорӣ бо Маркази таълими калонсолон ва шуғли аҳолии ноҳияи Шуғнон дар соли 2017 курсҳои кӯтоҳмуддат аз рӯи ихтисоси бофандагӣ, муҳрабофӣ  барои 30 нафар занон ва духтарони хонашин ташкил ва гузаронида шуданд. Инчунин намояндагии литсей дар деҳаи Тусёни ноҳияи Роштқалъа фаъолият мекунад, ки дар он ҳамасола беш аз 60 нафар, дар намояндагии литсей дар деҳаи Шитхарви ноҳияи Ишкошим бошад, беш аз 40 нафар касбу ҳунар омӯхта истодаанд. 

 

Китобхона ва хобгоҳ

Литсей дорои китобхонаи бою  замонавӣ буда, соли 2017 ба маблағи 6700 сомонӣ китобҳои дарсӣ-тахассусӣ, методӣ, ҷадвалу лавҳаҳо харидорӣ шуда, барои 30 нафар хонандагон толори дастайёркунӣ аз нав ҷиҳозонида шуд.

Моҳи майи соли 2011 дар арафаи таҷлили 20-солагии Истиқлолияти давлатии Ҷумҳурии Тоҷикистон, дар назди литсей хобгоҳ барои 200 нафар хонанда, бо тамоми шароитҳои замонавӣ ба истифода дода шуд ва дар айни замон дар он донишҷӯёни аз минтақаҳои дурдаст зиндагӣ карда истодаанд. Хобгоҳ бо ошхона, толори дарстайёркунӣ ва дигар лавозимот муҷаҳҳаз гардонида шудааст.

Дар литсей 78 нафар хонандагон аз оилаҳои камбизоат ва 23  нафар ятим таҳсил намуда истодаанд, ки онҳо бо хобгоҳи ройгон таъмин буда, ҳамеша ба онҳо аз ҳисоби даромади худдии литсей ва дигар ташкилотҳои сарпараст ёрдам расонида мешавад.

 

Ихтироот ва дастовардҳо

Муҳассилини литсей ба ғайр аз дарсҳои амалӣ инчунин ба ихтироот низ машғуланд ва аллакай чандин дастовардҳои худро дар озмунҳо ба намоиш гузоштаанд. Соли 2015 хонандаи гуруҳи «Челонгари таъмири автомобил» Нуров Фаридун «Робот-мошин»-ро ихтироъ намуда, дар озмуни ҷумҳуриявии «Бозёфт-2015» дар шаҳри Душанбе соҳиби ҷойи аввал гардид.

Соли 2015 хонандагон Чароҳ Зевар, Маскаев Амониддин, Замиров Гулрух дар  озмуни телевизионии ихтирокорони наврас «Бозёфт-2015» миёни ихтироъкорону навоварон дар маркази вилоят  шаҳри Хоруғ багузор гардид, бо дастовардҳои ихтирокардаи худ иштирок намуданд ва соҳиби ҷойи намоён гардида, бо Ифтихорномаҳо ва туҳфаҳои хотиравӣ сарфароз гардонида шудаанд.

Маъмурияти литсей диққати асосиро ба ташкил намудани шароити мусоид барои варзиш дар литсей, ташкили корҳои беруназдарсӣ вобаста ба ҷалби хонандагон ба варзиш дода истодааст. Маҳз дастгирии бевоситаи сарвари литсей аст,ки ҳамасола хонандагони литсей дар мусобиқаҳои вилоятию ҷумурҳиявӣ фаъолона иштирок намуда, ҷойҳои намоёнро сазовор мешаванд.

Моҳи марти соли 2015 донишҷӯи гуруҳи «Челонгари таъмири автомобил» Лашкариев Аҳмад дар мусобиқаи вилоятӣ аз намуди гӯштини тарзи озод байни  чор ноҳияи штирок карда, соҳиби ҷойи дуюм гардид. Дар соли 2016 бошад хонандаи гуруҳи №10 «Кафшергари газию барқӣ» Азизмамадов Мустафо дар чандин  мусобиқаҳои варзишии вилоятӣ ва ҷумҳуриявӣ оид ба самбо ва самбои рамзӣ ширкат варзида соҳиби ҷойи аввал, медали тилло. Чандин нишону ҷоизаҳои варзишӣ ва ифтихорномаҳои роҳбарияти Кумитаи кор бо ҷавонон ва варзиши назди Ҳукумати Тоҷикистон  гардид. Моҳи ноябри соли ҷорӣ хонандаи гуруҳи №2 Зикришоев Наврӯз аз фанни биология ва хонандаи гуруҳи №7 Исломбеков Аҳмад дар олимпиадаи вилоятӣ соҳиби ҷойи дуюм гардиданд.

 

Ба ҷои хулоса

Маъмурияти литсейи касбии техникии ноҳияи Шуғнон ҷиҳати ба таҷриба омӯзии истеҳсолӣ фиристонидани хонандагон ва инчунин бо кори доимӣ таъмин намудани онҳо бо муассисаҳои давлатӣ ва ғайридавлатӣ дар ВМКБ буда, бо Донишгоҳи Осиёи Марказӣ, Шабакаҳои барқии «Помир энерҷӣ», Филиали Амонатбонк дар н.Шуғнон, МДНРА-и водии Ғунди н.Шуғнон, ҶДММ «Бунёд», ҶДММ «Мадад», ҶДММ «Назрӣ», ҶДММ «Темур», стансияи бойтории ВМКБ, маркази ташхисии бойтории н.Мурғоб, Сарраёсати агентии омори назди Президенти Ҷумҳурии Тоҷикистон дар ВМКБ, гуруҳи муштараки манфиатдори «Орзу»-и минтақаи Вахон, муассисаи нигоҳдории роҳҳои автомобилгарди н.Ишкошим, муассисаи нигоҳдории роҳҳои автомобилгарди н.Рӯшон, раёсати молияи н.Мурғоб ва фабрикаи «Ҳаёти нав»- и н.Шуғнон дар соли 2018 шартномаҳои тарафайн оиди гузаронидани таҷрибаомӯзии хонандагон дар соли таҳсили 2017-2018 ба имзо расонид.

Литсеи мазкур дар давоми фаъолияти тӯлониаш, дар давоми чандин даҳсолаҳо  боз чун як махзани волои илму маърифат ва ҳунар дар таълиму тарбияи насли наврас ва омода кардани мутахассисони соҳаҳои гуногуни хоҷагии халқи вилояту ноҳия нақши мондагоре дорад ва бо боварии комил бояд гуфт, ки аҳли коллективи омӯзгорони муассиса дар бадали заҳмати ҳалолу масъулиятшиносии баланд дар пиёда сохтани сиёсати кунунии сарвари давлат дар иртибот ба масъалаи муҳими рӯз, тарбияи насли худшиносу худогоҳ, насле, ки модари худро, гӯшаи офтобии хешро дӯст дошта, дар ҳифзу ободии он аз таҳти дил саҳм дошта бошад, аз тамоми захираҳои мавҷуда самаранок истифода хоҳад бурд.

 

Маркази тадқиқоти журналастии Тоҷикистон

Хонданд 43
Махзани касбу ҳунар дар Панҷакент

Литсейи касбии техники шаҳри Панҷакент яке аз муассисаҳои маъмул ва машҳури ибтидоии касбӣ дар Ҷумҳурии Тоҷикистон буда, фаъолияти таълимиро дар асоси Қонуни Ҷумҳурии Тоҷикистон «Дар бораи маориф» Қонуни ҶумҳурииТоҷикистон «Дар бораи маълумоти ибтидои касбӣ», «Стандарти давлатии таълимии маълумоти ибтидои касбии Ҷуҳурии Тоҷикистон» ва санадҳои меъёрию ҳукуқӣ ба роҳ мондааст.   

Литсейи касбии техники шаҳри Панҷакент (собиқ омӯзишгоҳи касбӣ- техники №36 - и шаҳри Панҷакент) нахустин маротиба 15 марти соли 1961 дар базаи стансияҳои машинию тракторӣ (МТС) ташкилшуда, оинномаи талимгоҳ бо фармони вазири меҳнат, муҳоҷират ва шуғли аҳолии Ҷумҳурии Тоҷикистон таҳти №137 аз 19.10.2014 тасдиқ карда шудааст.  Литсей дорои ду бинои таълимии асосии 2 ошёна, 28 синфхонаҳои таълимии муҷаҳҳазгардонидашуда, як бинои устохонаи таълимию истеҳсолии 1 ошёна буда, 12 устохонаҳои таълимӣ, як бинои ошхона, толори варзишӣ ва толори маҷлисгоҳ мебошад. Бинои хобгоҳ 4 ошёна буда, барои 600 нафар хонанда сохта шудааст.

Литсей дорои иҷозатномаи таҳти №АУ № 000968 оид ба ҳуқуқи пешбурди фаъолияти таълимӣ бо нишондоди шартҳои махсусбуда, аз аттестатсия ва акредитатсия гузаронида шудааст. Дар айни замон дар литсей 25 нафар омӯзгорон ва 25 нафар устоҳои таълими истеҳсолӣ фаъолият доранд, ки миёни онҳо1 нафар номзади илм ва 1 нафар аълочии системаи касбӣ техникӣ мебошанд.

 

Ихтисосҳо

Дар Литсейи касбӣ-техникии шаҳри Панҷакент аз рӯи аксар касбҳои барои хоҷагии халқ муҳим мутахассис тайёр намуда истодаанд, ки дар бозори меҳнат серталаб аст, аз ҷумла:

1.Кафшергари барқӣ

2.Кафшергари газӣ

3.Ронандаи автомобили тоифаи «С»

4.Чӯбтарошбинокор

5.Системаҳои компютерӣ, интернет ва технология

6.Монтажчии барқӣ оид ба хизматрасонии таҷҳизотҳои барқӣ (шартномавӣ)

7.Тракторчӣ-мошинисти истеҳсолоти кишоварзӣ

8.Муҳосиб бо донистани дониши компютерӣ

9.Дӯзанда

Ҳоло дар МДТ «Литсейи касбии техникии шаҳри Панҷакент» беш аз 430 нафар хонандагон таҳсил доранд, ки 310 нафар пас аз хатми синфи 9 ва 100 нафар пас аз хатми синфи 11 дар литсей қабул шудаанд.

 

Фаъолияти кабинетҳои методӣ, дарсҳои кушод ва таҳлили дарсҳо

Хонаи методӣ фаъолияташро дар асоси нақшаи кори литсей ба роҳ монда, дар навбати аввал аз тарафи нигористон ба ҳамаи омӯзгорон ва устоҳои таълими истеҳсолӣ ёрии методӣ расонида мешавад. Роҳнамоӣ ба омӯзгорон ва устоҳои таълимӣ-истеҳсолии ҷавон, иштирок ба дарси омӯзгорон ва таҷрибаивазкунӣ, ташкил намудани дарсҳои кушод, иштироки омӯзгорон ва устоҳои таълими истеҳсолӣ дар дарсҳои ҳамдигарӣ аз фаъолияти ҳамешагии раёсати литсей ба ҳисоб меравад.

Бо мақсади ҳаматарафа такмил додани дониш ва касбияти омӯзгорон ва муҳассилин дар литсей дар ҷамъбасти шашмоҳа бо пешниҳоди хонаи методӣ дарсҳои кушод аз фанҳои физика, химия ва адабиёту риёзӣ гузаронида шуд, ки дар онҳо омӯзгорон аз методикаи дарсгузарии омӯзгорони таҷрибадор огоҳ гардида, дониши омӯхтаи худро дар дарсҳои таҷрибавӣ ба хонандагон меомӯзанд. Ба муносибати иди Артиши миллӣ дар литсей викторинаи фанни таърих, ба муносибати иди Наврӯз конференсия аз фанни ҷуғрофия гузаронида шуд, ки хонандагони литсей фаъолона иштирок намуданд

Дар давраи ҳисоботӣ бо дастгирии барномаи «Дастгирии ҷараёни ислоҳоти соҳаи таҳсилоти касбӣ ва таълими Ҷумҳурии Тоҷикистон, Компоненти ибтидоии касбии давлати Олмон 14 нафар омӯзгорон ва устоҳои таълими истеҳсолӣ аз семинару омӯзишӣ гузашта, аз методу услубҳои нав огоҳ гардидаанд.         

Дар давоми шашмоҳи соли 2018 дар асоси нақшаи ягонаи литсей аз  тарафи омӯзгорони бо таҷриба ва ҷавон 45-адад дарсҳои кушод аз фанҳои химия,  таърих, ҷуғрофия, технологияи иттилоотӣ, фанҳои тахассусии Қоидаи ҳаракат дар роҳ, техникаи барқӣ, масолеҳшиносии барқӣ, забони модарӣ гузаронида шуданд. 

Дар асоси нақшаи литсей соле 4 маротиба мониторинги  азхудкунии хонандагон аз фанҳои умумӣ ва фанҳои тахассуси санҷиш гузаронида мешавад. Мониторинги сифати таълим нишон дод, ки тайи солҳои охир усулҳои таълим ва азхудкунии касбҳо нисбати солҳои пешин нисбатан хуб шуда, омӯзгорон ва хонандагон кӯшиш карда истодаанд, ки фанҳои омӯзонидашавандаро хубтару беҳтар аз худ кунанд.

 

Ҳолати хобгоҳи литсей

Ҳоло дар хобгоҳи Литсейи касбии техникии шаҳри Панҷакент беш аз 100 нафар оилаҳои бегона истиқомат дошта танҳо дар 32 ҳуҷра 110 нафар хонандагон зиндагӣ карда истодаанд. Дар бинои хобгоҳ ва ошхонаи литсей таъмири ҷорӣ гузаронида шуда истодааст. Ҳуҷраҳои хобгоҳҳо бо ҷевон  кӯрпаю болишти нав таҷҳизонида шуда, барои тамошои барномаҳои телевизион ҳуҷраи алоҳида бо лавозимоти лозимӣ ва телевизор муҷаҳҳаз гардонида шудааст. Инчунин дар аввали соли хониш утоқи саршӯӣ (ҳаммом) барои бошандагони хобгоҳ сохта, ба истифода дода шудааст. Мушкили асосӣ дар хобгоҳ ба таври ғайриқонунӣ зиндагӣ кардани оилаҳое мебошад, ки солҳои 90 дар он маскун шудаанд ва дигар нияти баромадан аз хобгоҳро надоранд. Хобгоҳи мазкур барои хонандагон ва омӯзгорон пешбинӣ шуда, зарурияти пурра баргардонидани он ба литсей ба вуҷуд омадааст.

 

Пойгоҳи моддию техникӣ.

Литсей дорои заминаи бои модди-техникӣ мебошад, ки дар омӯзиши касбияти муҳассилин нақши бориз дорад. Технопарки литсей дорои якчанд мошини боркаш, тракторҳои гуногунтамға, дастстгоҳҳои коркарди чӯб,  мошинаҳои дарздӯзии Чайка мебошад, ки аксари онҳо дар ҳолати хуби корӣ қарор дошта, дар дарсҳои таҷрибавӣ хонандагон бевосита бо онҳо кор мекунанд. Синфхонаҳо ва кабинетҳои фаннӣ бо асбобҳои лозимӣ муҷаҳҳаз гардонида шуда, дар литсей инчунин 10 адад компютер, 4 адад принтер, 1 адад проектор, 1адад экран, 1 адад факс мавҷуд аст. Дарсҳои таҷрибаомӯзии истеҳсолӣ бошанд дар комбинати тиллои муштараки Тоҷикистону Чин “Зарафшон”, шабакаҳои барқи шаҳри Панҷакент, шуъбаи алоқаи шаҳри Панҷакент, корхонаи дӯзандагии Нисо, хоҷагиҳои деҳқониии ноҳия, корхонаҳои саноатӣ, аз ҷумла заводи хишт ва корхонаи коркарди тамоку баргузор мегарданд.

 

Китобхона

Китобхонаи таълимгоҳ дорои 5852 адад китоб мебошад, ки аз он 2172 нусхаро китобҳои дарсӣ, 380 нусха китобҳои бадеӣ, 2011 нусха китобҳои техникӣ, 46 нусха китобҳои методӣ ва 15 нусха китобҳои Президенти кишварро ташкил медиҳад.

Аз суҳбат бо роҳбарияти литсей бармеояд, ки на ҳама маводҳои дарсӣ аз қабили китобҳо ва макетҳо дастрас мебошанд ва барои ислоҳи вазъ ва таъмини китобҳо ба мадади Вазорати маориф ва илми Ҷумҳурии Тоҷикистон эҳтиёҷ доранд. Дар литсей агарчӣ китобу макетҳо ҳастанд вале онҳо  нокифоя мебошанд. 

Роҳбарият ва устодони Литсейи касбии техники шаҳри Панҷакент бо такя ба дастуру супоришҳои Пешвои миллат, Асосгузори сулҳу Ваҳдати миллӣ, Президенти Ҷумҳурии Тоҷикистон, муҳтарам Эмомалӣ Раҳмон амал намуда, ҳама донишу таҷрибаи худро ба тарбияи кадрҳои баландихтисос равона намуда истодаанд.

 

Маркази тадқиқоти журналистии Тоҷикистон

Хонданд 130
  •  << 
  •  < 
  •  1 
  •  > 
  •  >> 

Хабари-рӯз

Календар

« Декабрь 2018 »
Пн Вт Ср Чт Пт Сб Вс
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Минбари сардабир

  • симКАРта

    Дар ҳафтае, ки гузашт, дар шабакаҳои иҷтимоӣ ин калима аз…

Назарҳо

Яндекс.Метрика

 

Яндекс.Метрика

 

© «Фараж», 2011-2018. Истифодаи маводи сайти мазкур танҳо бо иҷозати хаттии идора мумкин аст.

Нишонии идора: шаҳри Душанбе, хиёбони Саъдии Шерозӣ, 16, ошёнаи 8.
Сайт бо кӯмаки моддии Free Press Unlimited сохта шудааст.